ਉਹ ਇੱਕ ਦੇਸ ਉੱਤਰ ਵੱਲ
ਜਿੱਥੇ ਬੇਵਸ ਕੁੜੀਆਂ ਨੂੰ ਛੱਡ ਗਏ
ਵੱਡੇ ਦਮਗਜੇ ਮਾਰਨ ਵਾਲੇ
ਚਾਨਣ ਤੋਂ ਮਹਰੂਮ !
ਤਾਂ ਕਿ ਝੂਠ ਨਾਲ
ਉਨ੍ਹਾਂ ਦੇ ਜ਼ਿਹਨ ਗੰਧਲਾਏ ਜਾ ਸਕਣ !
ਨਿੱਕੇ ਨਿੱਕੇ ਚਾਅ ਦਫ਼ਨ ਕਰਨ ਲਈ
ਹੋਈਆਂ ਉਹ ਮਜਬੂਰ
ਬਣਕੇ ਰਹਿ ਗਈਆਂ ਜਗਤ ਤਮਾਸ਼ਾ !
ਪਰ ਸਭਿਅਤ ਸੰਸਾਰ ਚੁੱਪ ਹੋਕੇ
ਹਲਕੀਆਂ ਰੂੰ ਵਰਗੀਆਂ ਆਸਾਂ
ਦੇ ਪਤੰਗ ਉੜਾ ਰਿਹੈ !
ਕਿੱਥੇ ਹੈ ਇਹ ਸੰਸਾਰ ਲੋਕਤੰਤਰ ਦੇ ਢੋਲ ਵਜਾਵਣ ਵਾਲਾ ?
ਸੜਕਾਂ ਤੇ ਗਿਰਗਟ ਵਰਗੇ ਜਵਾਨ
ਕਰਦੇ ਮਖੌਲਾਂ ਕੁੜੀਆਂ ਨੂੰ
“ਬੁਰਕੇ ਪਾਓ
ਇੱਕ ਦਿਨ ਵਿੱਚ ਵਿਆਹ ਕਰਾਂਗੇ ਅਸੀਂ ਚਾਰ ਚਾਰ |”
ਮਰਦ ਨੂੰ ਬਹੁਤ ਛੋਟਾ ਹੁੰਦਾ ਵੇਖੋ !
ਸਾਡੀਆਂ ਚਿੜੀਆਂ ਨੂੰ ਕੌਣ ਉਡਾਵੇ
ਖੁੱਲੀ ਫ਼ਿਜ਼ਾ ਵਿੱਚ ਕਿਉਂਕਿ
ਹਵਾ ਵਿੱਚ ਫੈਲ ਗਈ
ਟੋਭੇ ਦੇ ਡੱਡੂਆਂ ਦੀ ਸੋਚ !
ਕਿੱਥੇ ਹੈ ਸੰਸਾਰ
ਜੋ ਸੰਸਾਰ ਦੇ ਸਟੇਜ ‘ਤੇ
ਲੋਕਤੰਤਰ ਦੀ ਦੁਹਾਈ ਪਾਉਂਦਾ ਨਹੀਂ ਸੀ ਥੱਕਦਾ
ਪਰ ਹੁਣ ਤਮਾਸ਼ਬੀਨ ਬਣਿਆ !
ਬੇਵਸ ਬੇਸਹਾਰਾ ਨੂੰ ਗਿਰਵੀ ਧਰ ਗਏ
ਵਪਾਰਾਂ ਵਿੱਚ ਲਿੱਬੜੇ ਵੱਡੇ ਦੇਸ਼ !
ਕਲਾਸਲੈਸ ਸਮਾਜ ਦੇ ਉਸਾਰੂ ਅਖਵਾਉਣ ਵਾਲੇ
ਵਪਾਰ ਦੀ ਖਾਤਰ ਜੰਗਲ ਦੇ ਰਾਜ ਦੀ ਢੋਲਕੀ
ਵਜਾਉਣ ਲਈ ਤਿਆਰ ਬਰ ਤਿਆਰ |
ਉਹ ਇੱਕ ਦੇਸ ਉੱਤਰ ਵੱਲ
ਜਿੱਥੇ ਬੇਵਸ ਕੁੜੀਆਂ ਨੂੰ ਛੱਡ ਗਏ
ਵੱਡੇ ਦਮਗਜੇ ਮਾਰਨ ਵਾਲੇ
ਕਿ ਉਹ ਅੰਦਰ ਬੰਦ ਰਹਿਣ
ਚਾਨਣ ਤੋਂ ਮਹਰੂਮ !
ਗ ਸ ਨਕਸ਼ਦੀਪ ਪੰਜਕੋਹਾ
