ਤਾਂ ਕੀ ਜੇ ਹੈ ਮੀਡੀਆ ਵਿਕਾਊ?
ਵਿਕ ਗਿਆ ਮੀਡੀਆ, ਨਹੀਂ ਇਹ ਕੰਨ ਅੱਖਾਂ ਤੁਹਾਡੇ,
ਪਰ ਹੌਸਲਾ ਨਾ ਛੱਡਣਾ, ਢੇਰੀ ਤੁਸੀਂ ਨਹੀਂਓਂ ਢਾਉਣੀ!
ਇਹ ਵਿਕੇ ਮੱਸਿਆ ਦੀ ਰਾਤ ਲਈ, ਵਾਰੋ ਵਾਰ ਸਾਰੇ,
ਤੁਸੀਂ ਮੱਸਿਆ ਦੀ ਰਾਤੇ, ਹੁਣ ਹੈ ਚਾਨਣੀ ਖਿੰਡਾਉਣੀ!
ਇਹ ਪੂਪਨੇ ਵਜਾਉਂਦੇ, ਐਵੇਂ ਬਹੁਸੰਮਤੀ ਦੇ ਨਸ਼ੇ ਵਿੱਚ,
ਦਿਨ ਇਨ੍ਹਾਂਂ ਦਾ ਚੜਿਆ ਸੀ, ਹੁਣ ਸ਼ਾਮ ਵੀ ਹੈ ਆਉਣੀ!
ਤੁਹਾਡੀ ਮਿਠਾਸ ਹਥਿਆਰ, ਤੁਹਾਡੇ ਹੌਸਲੇ ਤੁਫਾਨੀ,
ਹੰਕਾਰ ਦੀ ਇਹ ਪਹਾੜੀ, ਤੁਹਾਡੇ ਪੈਰਾਂ ਹੇਠ ਆਉਣੀ!
ਲੱਗੇ ਲੋਕ ਤੁਹਾਡੇ ਨਾਲ, ਰਹਿਗੇ ਚਮਚੇ ਹੁਣ ਥੋੜੇ,
ਜਗ ਵਿੱਚ ਹੁਣ ਤੁਹਾਡੀ, ਬੜੀ ਬੱਲੇ ਬੱਲੇ ਹੈ ਹੋਣੀ!
ਵੇਖੋ ਚਾਲੇ ਇਨ੍ਹਾਂ ਦੇ, ਜੋ ਦੁਹਾਈ ਧਰਮ ਦੀ ਨੇ ਪਾਉਂਦੇ,
ਮਾਣਸ ਪ੍ਰੀਤ ਕਦੇ, ਇਨ੍ਹਾਂ ਕੋਲੋਂ ਲੱਭੀ ਨਹੀਂ ਥਿਆਉਣੀ!
ਇਨਾਂ ਦੇ ਝੂਠੇ ਸਾਰੇ ਦਾਹਵੇ, ਹਨ ਖੋਟੀਆਂ ਕਰਤੂਤਾਂ,
ਹੌਲੀ ਹੌਲੀ ਇਨ੍ਹਾਂਂ ਦੇਸ਼ ਵਿੱਚ, ਸਿਰਫ਼ ਵੰਡ ਹੀ ਹੈ ਪਾਉਣੀ!
ਲਹਿਰ ਵਿੱਚ ਤੁਸੀਂ ਸਾਰੇ, ਜਦ ਕਦੇ ਇਕਮਿਕ ਹੋ ਆਏ,
ਉਦੋਂ ਧੱਕੇਬਾਜ ਸ਼ਾਸ਼ਕਾਂ ਨੂੰ, ਅਕਲ ਹੈ ਤੁਸੀਂ ਹੀ ਸਿਖਾਉਣੀ!
ਜੇ ਕਿਤੇ ਚੁੱਪ ਤੁਸੀਂ ਰਹੇ, ਇਨ੍ਹਾਂ ਸ਼ਰੇਆਮ ਹੈ ਤੁਹਾਨੂੰ ਲੁੱਟਣਾ,
ਲਿਪਟੇ ਰਹੋਗੇ ਰਾਤ ਵਿੱਚ, ਨਕਸ਼ਦੀਪ ਫਿਰ ਸਵੇਰ ਨਹੀਂ ਆਉਣੀ!
