ਆਪਣਾ ਘਰ – ਲੇਖਕ : ਗ ਸ ਨਕਸ਼ਦੀਪ ਪੰਜਕੋਹਾ
ਹੁਣ ਤਾਂ ਸਮਝੋ ਮੇਰੇ ਲੋਕੋ, ਕਰਤੂਤਾਂ ਨੇ ਸ਼ੀਸ਼ਾ ਵਿਖਾਇਆ!
ਏਥੇ ਜੀਵਨ ਮੌਤ ਬਿਲਕਦੇ, ਥਾਂ ਥਾਂ ਹੈ ਸਿਵਾ ਜਲਾਇਆ !
ਧਰਤੀ ਮਾਂ ਦੀ ਕੁੱਖ, ਸਭ ਕੁਝ ਲੈ ਲੈਂਦੀ ਮੈਂ ਸਦਕੇ,
ਤੰਗ ਹੈ ਦਿਲ ਮਨੁੱਖ ਦਾ, ਹਾਉਂ ਬਿਨ ਕੁਝ ਨਾ ਸਮਾਇਆ!
ਗਲ ਘੁੱਟ ਘੁੱਟ ਲੋਕਾਂ ਦੇ, ਉਨਾਂ ਨੇ ਹਨ ਪੱਥਰ ਉਸਾਰੇ,
ਗਜਬ ਵੇਖੋ ਕਿ ਕੋਈ ਵੀ, ਨਹੀਂ ਹੈ ਸੜਕ ‘ਤੇ ਆਇਆ !
ਪਾਣੀ ਮਾਰੂਥਲ ਦੇ ਵਿੱਚ, ਭਾਲਣ ਵਾਲਿਓ ਜਰਾ ਸੋਚੋ,
ਦਰਿਆ ਦੇ ਕੰਢੇ ਹੀ ਕਿਉਂ, ਕੋਈ ਮਰੇ ਤਿਰਹਾਇਆ ?
ਇਹ ਤੁਹਾਡਾ ਘਰ ਹੈ, ਰਾਖੇ ਬਣਜੋ ਤੁਸੀਂ ਇਸ ਦੇ ਹੁਣ,
ਦੱਸੋ ਭਲਾਂ ਕਦ ਦਗਾਬਾਜ ਨੇ, ਹੈ ਸਾਥ ਨਿਭਾਇਆ ?
ਸਬਜਬਾਗਾਂ ਦੇ ਨਾਹਰੇ ਲਾ, ਉਹ ਦਰ ਦਰ ਮੰਗਣ ਵਾਲੇ ,
ਉਨਾਂ ਦੇ ਸਿਰ ’ਤੇ ਅਸੀਂ ਭੋਲਿਆਂ, ਹੈ ਤਾਜ ਸਜਾਇਆ !
ਜੇ ਹੁਣ ਨਹੀਂ ਜਾਗੇ ਨਕਸ਼ਦੀਪ, ਤਦ ਰਾਖ ਹੋ ਜਾਵੋਗੇ,
ਬਹੁਤੇ ਖੋਟੇ ਹਨ ਏਥੇ, ਕੀ ਕੋਈ ਆਪਣਾ ਕੀ ਪਰਾਇਆ !
