Poetry

ਸ਼ਾਂਤੀ ਸਰੂਪ ਯੋਧੇ
ਇਹ ਜੰਗ ਹੈ ਅਸਾਡੀ ਧੱਕਿਆਂ ਵਿਰੁੱਧ,
ਲੜਨੀ ਇਹ ਅਸੀਂ ਹਥਿਆਰ ਤੋਂ ਬਿਨਾਂ !
ਕੋਈ ਵੀ ਤੋੜ ਫੋੜ ਅੱਗਾਂ ਲਾਉਣ ਤੋਂ ਬਿਨਾਂ,
ਹੋਰਨੀ ਨਿਸ਼ਾਨਾ ਧੱਕੇਬਾਜਾਂ ਨੂੰ ਹਰਾਉਣ ਤੋਂ ਬਿਨਾਂ !
ਬਹੁਤ ਭੜਕਾਉਣਗੇ ਅਸੀਂ ਸਾਵਧਾਨ ਰਹਿਣਾ,
ਟੀਚਾ ਹੋਰ ਨਹੀਂ ਸਾਡਾ ਜਿੱਤ ਪਾਉਣ ਤੋਂ ਬਿਨਾਂ !
ਜੋ ਇੰਝ ਕਰੇ ਕੋਈ ਉਹ ਹੋਊ ਇਨ੍ਹਾਂ ਦਾ ਹੀ ਬੰਦਾ
ਜਿਹਦਾ ਕੰਮ ਹੋਰ ਨਹੀਂ ਸਾਨੂੰ ਭੜਕਾਉਣ ਤੋਂ ਬਿਨਾਂ !
ਵੇਖਾਂਗੇ ਇਹ ਸਾਨੂੰ ਕਿੰਝ ਕਿੰਝ ਅਜਮਾਉਂਦੇ,
ਸਾਡਾ ਟੀਚਾ ਹੋਰਨੀ ਇਨ੍ਹਾਂ ਨੂੰ ਜਗਾਉਣ ਤੋਂ ਬਿਨਾਂ !
ਅਸੀਂ ਜਿੱਤਾਂਗੇ ਸ਼ਾਂਤੀ ਦੇ ਨਾਲ ਇਸ ਜੰਗ ਨੂੰ,
ਇਨ੍ਹਾਂ ਕੋਲ ਹੋਰ ਕੀ ਦੀਵੇ ਬੁਝਾਉਣ ਤੋਂ ਬਿਨਾਂ !
ਅਸੀਂ ਸ਼ਾਂਤੀ ਸਰੂਪ ਯੋਧੇ ਪਰ ਇਨ੍ਹਾਂ ਕੋਲੇ,
ਕੁਝ ਨਹੀਂ ਬਿਗਾਨੇ ਪੁੱਤ ਮਰਵਾਉਣ ਤੋਂ ਬਿਨਾਂ !
ਧੱਕੇਬਾਜੀ ਦਾ ਨਕਸ਼ਦੀਪ ਇਹ ਦੌਰ ਨੇ ਲਿਆਏ ,
ਸਾਡੇ ਕੋਲ ਹੁਣ ਕੀ ਇਨ੍ਹਾਂ ਨੂੰ ਹਟਾਉਣ ਤੋਂ ਬਿਨਾਂ !
ਗ ਸ ਨਕਸ਼ਦੀਪ ਪੰਜਕੋਹਾ

ਫੈਸਲੇ ਦੀ ਘੜੀ
ਕਿਸਾਨਾਂ ਨਾਲ ਜੋ ਅੱਜ ਹੋਈ
ਉਹ ਤੁਹਾਡੇ ਨਾਲ ਵੀ ਹੋਵੇਗੀ!
ਤੁਹਾਡੇ ਪੱਲੇ ਜੋ ਰਹਿ ਗਿਆ ,
ਉਹ ਅਮੀਰ ਜਾਤ ਖੋਹ ਲੈ ਜਾਏਗੀ !
ਤੁਸੀਂ ਬਣ ਤਮਾਸ਼ਬੀਨ ਇੰਝ,
ਤੱਕਦੇ ਤਮਾਸ਼ਾ ਰਹਿ ਜਾਣਾ !
ਫੇਰ ਲਭਦੇ ਰਹਿ ਜਾਓਗੇ,
ਸਭ ਕੁਝ ਪਾਣੀ ‘ਚ ਬਹਿ ਜਾਣਾ !
ਤਦ ਹੱਥ ਉਨ੍ਹਾਂ ਦੇ ਤਲਵਾਰ,
ਤੇ ਗਰਦਨ ਤੁਹਾਡੀ ਹੋਵੇਗੀ !
ਕਿਸਾਨਾਂ ਨਾਲ ਜੋ ਅੱਜ ਹੋਈ
ਕੱਲ੍ਹ ਤੁਹਾਡੇ ਨਾਲ ਹੋਵੇਗੀ !
ਸਮਝੋ ਸਮੇਂ ਦਾ ਰੁੱਖ ਹੁਣ,
ਇਸ ਲਹਿਰ ਨਾਲ ਜੁੜ ਜਾਓ !
ਇਨਾਂ ਫੁੱਟਾਂ ਦੇ ਰਾਹਾਂ ਤੋਂ,
ਤੁਸੀਂ ਹੁਣ ਵਾਪਿਸ ਮੁੜ ਆਓ !
ਫੇਰ ਕੱਲ੍ਹ ਦਿਨ ਵੀ ਤੁਹਾਡਾ,
ਤੇ ਤੁਹਾਡੀ ਸ਼ਾਮ ਵੀ ਹੋਵੇਗੀ !
ਕਿਸਾਨਾਂ ਨਾਲ ਜੋ ਅੱਜ ਹੋਈ,
ਉਹ ਕੱਲ੍ਹ ਤੁਹਾਡੇ ਨਾਲ ਵੀ ਹੋਵੇਗੀ !
ਘਰ ਫੂਕ ਤਮਾਸ਼ੇ ਵੇਖਣੇ,
ਤੁਸੀਂ ਹੁਣ ਸਥਿਓ ਛੱਡ ਦਿਓ !
ਜੋ ਲੱਗੀ ਘਰਾਂ ਨੂੰ ਸਿਓਂਕ,
ਉਸਦਾ ਰੱਸਾ ਹੀ ਵਢ ਦਿਓ !
ਇਹ ਚੁੱਪ ਤੁਹਾਡੀ ਨਹੀਂ ਤਾਂ,
ਤੁਹਾਨੂੰ ਵਾਰ ਵਾਰ ਜੋਹੇਗੀ !
ਕਿਸਾਨਾਂ ਨਾਲ ਜੋ ਅੱਜ ਹੋਈ,
ਕੱਲ੍ਹ ਤੁਹਾਡੇ ਨਾਲ ਵੀ ਹੋਏਗੀ!
ਲੋਕਾਂ ਨੂੰ ਪਾੜ ਪਾੜ ਕੇ,
ਉਨ੍ਹਾਂ ਧੌਲਰ ਉਸਾਰ ਲਏ !
ਇਹ ਕਾਹਦੀ ਆਜ਼ਾਦੀ ਮਿਲੀ ,
ਚਾਰ ਬੋਲ ਜੇ ਉਚਾਰ ਲਏ !
ਤੁਹਾਡੀ ਬੇਦਿਲੀ ਦੇ ਕਾਰਨ,
ਤੁਹਾਡੀ ਚੁੱਪ ਬੋਲੀ ਵੀ ਕੋਹਦੇਗੀ !
ਕਿਸਾਨਾਂ ਨਾਲ ਜੋ ਅੱਜ ਹੋਈ ,
ਉਹ ਤੁਹਾਡੇ ਨਾਲ ਵੀ ਹੋਏਗੀ !
ਇੱਕ ਮੁੱਠ ਹੋਕੇ ਜੇ ਹੁਣ,
ਤੁਸੀਂ ਮੌਕਾ ਸੰਭਾਲ ਲਿਆ!
ਨਕਸ਼ਦੀਪ ਦੀਵਾ ਅਕਲਾਂ ਦਾ,
ਜੇ ਤੁਸੀਂ ਅੱਜ ਬਾਲ ਲਿਆ !
ਫੇਰ ਤਾਂ ਤੁਹਾਡੀ ਉਲਾਦ ਵੀ,
ਨਵੇਂ ਨਵੇਂ ਨਿਤ ਨਗਮੇ ਬੋਏਗੀ !
ਕਿਸਾਨਾਂ ਨਾਲ ਜੋ ਅੱਜ ਹੋਈ,
ਕੱਲ੍ਹ ਤੁਹਾਡੇ ਨਾਲ ਵੀ ਹੋਏਗੀ !
ਤੁਹਾਡੇ ਪਲ੍ਹੇ ਜੋ ਰਹਿ ਗਿਆ,
ਉਹ ਅਮੀਰ ਜਾਤ ਖੋਹ ਲੈ ਜਾਏਗੀ !
ਗ ਸ ਨਕਸ਼ਦੀਪ ਪੰਜਕੋਹਾ